ميني طورطات حلوين باردين طريقة التحضير بالصور

السلام عليكم جاراتي العزازات اش خباركم ؟؟؟ ميني طورطات حلوين
باردين ومشروحين بطريقة جد سهلة من عند الاخت كريمة جزاها الله
كل خير لتحضيرها فالمناسبات واعياد الميلاد ومكتحتاجش عناء كبير
باش توجد ان شاء الله حتى بالنسبة للمبتدئات
نبداو بسم الله

المقادير :

مقادير عجينة صابلي :
250 غرام طحين
120 غرام سكر جلاصي
125 غرام زبدة
50 غرام بودرة اللوز
بيضة واحدة
كيس سكر الفاني
قبصة ملح

للتزيين :
قطع فواكه طرية مشكلة
شكلاط بالوان واشكال مختلفة
مقادير كريم موسلين :
2 اصفر البيض
200 مليلتر حليب
50 غرام سكر سنيدة
15 غرام نشا الذرة
عود من الفاني اولا خنيشة سكر فاني
100 غرام زبدة

مقادير كريم الشكلاط :
30 غرام سكر
30 غرام جليكوز
30 غرام زبدة
150 غرام قشدة طرية سائلة
160 غرام شكلاط اسود

طريقة التحضير :

اولا نبداو بتحضير عجينة صابلي نديرو الطحين والزبدة حتى
تخلط الزبدة السكر وبودرة اللوز والملح ونخدموهم
مع بعضهم مزيان

ونجمعو العجينة ديالنا بالبيضة ديالنا

غير نجمعوها بلا ماندلكوها

ونغطيوها ببلاستيك غذائي

وندخلوها للثلاجة لمدة 30 دقيقة تقريبا ومن بعد نخرجها من الثلاجة
ونسرحها بالدلاك فوق طبلة مرشوشة بالطحين اولا نطلقوها مابين
جوج بلاستيكات ونقطعو بالمقطع ديالنا

ونجيبو مول ديال كب كيك ونقلبوها ونحوطو
فوقو العجينة لي قطعنا

وندخلوها الفران مسخن على درجة حرارة 180 اولا الا كان
فرن ديال الغاز يكون سخون مزيان ونخليوهم لمدة 10 دقايق
ونخرجهم من الفرن

وملي ياخدو درجة حرارة المطبخ نعمروهم بالكريم لي حبيتو انا
وجدت جوج كريم الشكلاط الاسود وكريم موسلين اولا نوجدو
كريم الشكلاط الاسود فكسرونة نديرو الزبدة والسكر
والجليكوز فوق نار مهيلة

حتى يسخن الخليط مزيان ونزيدو عليها القشدة الطرية
وحنا كنخلطو وملي تغلى مزيان نديرو الشكلاط الاسود

ونحركو مزيان حتى يدوب الشكلاط
ويولي خليط جد متجانس

ونحيدو من فوق العافية وملي يفتر وياخد درجة حرارة
المطبخ ندخلوه للثلاجة وملي تبرد مزيان نخرجوها

ونديروها فالجيب الحلواني ونعمرو بيها نصف كمية
ميني طورطات ديالنا ونوجدو دابا كريم موسلين ديالنا نديرو
الحليب فوق العافية وعود الفاني

حتى يغلي ونخلط فاناء البيض والسكر والنشا

بالخلاط اليدوي حتى يولي اللون ديال الخليط ديالنا ابيض
وملي يغلى الحليب مزيان نزيدوهم على الخليط ديالنا

وحنا كنحركو مزيان باش ميطيبش البيض ويتكور
وملي يولي الخليط متجانس

ومن بعد نعاودو نحطوها
فوق العافية باش يعقاد الخليط ديالنا

وناخدو الزبدة ديالنا ونقسموها على جوج

الجزء الاول ونديروه فالكريم ديالنا

ونخلطوه مزيان حتى متبقاش الزبدة باينة فالكريم

والجزء الثاني نحتافظو بيه ومن بعد نغطيو الكريم بالبلاستيك الغذائي ومنخليوش بيناتهم الفراغ باش الهواء ميخصرش لينا الكريما ديالنا

نديروه فالثلاجة حتى تبرد مزيان ونطربو الزبدة حتى تولي بحال الكريمة

ونزيدوها على الكريم لي وجدنا ونخلطوهم مزيان مع بعضهم بالطراب

حتى يولي عندنا كريم جاهز للاستعمال

ونديروه حتى هو فجيب حلواني نقي ونعمرو بيه
النصف  ديال الطورطات صغيورين ديالنا

ونزينو الكل بحبيبات ورقائق الشكلاط

وجزء بالفواكه طرية بالوان مختلفة

باش تجدب العين وكيفما كيقول المثل تاكل العين قبل المعدة
بالصحة والراحة وكنتمنى يعجبوكم ميني طورطات
باردين وحلوين بالصحة والراحة

متنساوناش من صالح دعائكم جزاكم الله خيرا
وبالخصوص الاخت كريمة ودعواتكم بالشفاء العاجل
لاغلى الناس في امان الله