ميني بطبوط لذيذ بطريقة جد سهلة

السلام عليكم جاراتي اش اخباركم هاد المرة بغيت نشارك معاكم ميني بطبوط
بطريقة جد سهلة من عند الاخت كريمة الله يجازيها بالخير يمكن حتى المبتدئات
في مجال الطبخ يحضروه و ان شاء الله تكون وصفة ناجحة
نبداو بسم الله

المقادير :

400 غرام طحين
200 غرام دقيق القمح او سميد رقيق
معلقة كبيرة سكر
معلقة صغيرة ملح 20 غرام خميرة الخبز
350 مليلتر ماء دافئ

طريقة التحضير: 

باش نوجدو ميني بطبوط كنديرو اولا فقصرية جميع المكونات من
طحين و سميد و سكر و خميرة الخبز

ونجمعوها بالما ونخليو الملح هي الاخيرة عاد كنضيفوها

بالنسبة للماء انا حطيت نسبة تقديرية ممكن تحتاجي جارتي العزيزة قل اولا اكثر
على حساب نوعية الدقيق والسميد وندلكو العجينة مزيان

ونديروها فشي بلاصة دافية ونخليوها تخمار

وملي تخمر مزيان

نسرحوها فوق سطح مرشوش بالسميدة غليضة ماشي بحال لي درنا فالعجينة رقيقة

ونجيبو كاس ونقطعو العجينة كاملة بهاد الكاس

ونستفوهم فشي صينية ونخليوهم يرتاحو 10 دقايق تقريبا

ونديرو مقلة ثقلية تسخن فوق العافية مزيان و عاد نبداو نطيبو فيها

و نبقاو نقلبو كل مرة حتى يتحمر من الوجوه ديالو بجوج مزيان وملي نبداو نطيبو
نقصو من العافية نخليوها مهيلة باش يطيب على خاطروا ومن بعد نعمرو بالحشوة
لي حبيتي دجاج اولا كفتة مع البصلة و الفلفلة والخضر مشكلة يكونو مشحرين مزيان

اولا حشوة باردة فيها الطون و الذرة والزيتون والكاشير
والخس ومن طبيعة الحال هادو مجرد اقتراحات

وهاهو ميني بطبوط بالصحة و الراحة

نتمنى يعجبكم و تجربوه ان شاء الله