بيني رائع ومقرمش وطريقة تحضيره جد سهلة

السلام عليكم جاراتي ان شاء الله تكونو بخير وعلى
خير اليوم بغيت نشارك معاكم بيني وطريقة التحضير
ديالو لي كانت فقط حكر غير على الناس من عندمن
كنشريوه اما الان ان شاء الله توجديه ويعجبك تفرحي
بيه عائلتك الكبير منهم و الصغير وكلشي عندك
فبيتك ان شاء الله نقولو بسم الله

مقادير بيني رائع ومقرمش :

300 غرام طحين ابيض
130 مليلتر حليب دافي
بيضة
ملعقة كبيرة زبدة بدرجة حرارة المطبخ
معلقة خميرة الخبز
معلقة كبيرة سكر سنيدة
معلقة صغيرة خميرة الحلوة
شوية الملح
للتزيين :
السكر سنيدة

طريقة التحضير :

اول حاجة باش نوجدو بيني ديالنا ندوبو الخميرة فشوية الما
معاها معلقة كبيرة ديال سكر سنيدة وفقصرية نديرو الطحين
و الزبدة و الخميرة و البيضة

ونزيدو الخميرة لي دوبنا مع السكر و نخلط هادشي كامل

ونبداو نجمعو العجينة بالحليب دافي

وندلكوها مزيان

وخاص تكون العجينة رطبة مزيان

ونغطيوها مزيان ونحطوها فشي بلاصة دافية
ونخليوها تخمار على الاقل 3 سوايع

وملي تخمار نعاودو نجمعوها ونحطوها فوق طبلة مرشوشة بالطحين

وناخدوها ونسرحوها بالمدلك فوق سطح مرشوش مزيان بالطحين

ومن بعد نجيبو مقطع دائري او زلافة
القطر ديالها صغير شوية ونقطع بيه

حتى نكمل الكمية ديال العجينة لي عندي كاملة
ونستفو فوق شي صينية اولا طاوة

ونغطيوها بشي منديل ونخليوها يعاود يخمار عاود

ومن بعد نوجد زيت القلي يكون سخون مزيان
ونبدا نطيب

وملي يشد فراسو نقص العافية باش يولي لونو زوين محمر
و ميتحرقش وملي يفتر شوية ندير وجهو فوق السكر سنيدة

وممكن ايضا تفكيه وتدهنيه من الداخل ديالو بالشكلاط
اولا المربى وممكن ايضا انك مديريش السكر من الفوق اوديري
فيه البيض مسلوق من الوسط وممكن تقديمه كيفما هو وتخلي
الاختيار لكل واحد ونقدموه بالصحة و العافية

لا تنسونا من صالح دعائكم