بيتزا بخبز التوست سريعة و لذيذة

سلام عليكم جاراتي ليوم جبت ليكم بيتزا بخبز التوست سريعة و لذيذة

بالنسبة للجارات لي معندهمش الوقت باش يديرو لعجينة ديال بيتزا

بيتزا بخبز التوست من شهيوات الجارة حنان التوست

بسم الله نبداو

مقادير بيتزا بخبز التوست

شرائح ديال توست
طون ديال زيت
بصلة مشحرة مقطعة رقيقة
فلفلة مشحرة فشوية ديال زيت
زيتون اخضر مقطع
فرماج محكوك
شوية ديال زعتر محكوك
كاشير محكوك اختياري

لاصوص ديال بيتزا جاهزة انا كنديرها فدار راها معروفة

كندير فيها بصلة محكوكة مطيشة محكوكة

مطيشة ديال الحك قزبر معدنوس مقطعين رقاق

ضريس ديال ثومة محكوك زعتر محكوك ملح ابزار شوية سكنجبير

تحميرة و لهريسة حارة شي 3 معالق ديال زيت شوية زعفران

يلا بغيتي زيدي شوية مطيشة ديال الكرطونة

كتشحري هادشي مزيان حتى ينشف من لما و هاهيا واجدة

طريقة التحضير :

كنخدو توست ديالنا و ندهنوه ب لاصوص ديال مطيشة

و من بعد نحطو لبصلة و طون و  لفلفلة

وعاد كنزيدو زيتون مقطع و نرشو زعتر محكوك

و اخيراً كنرشو لفرماج محكوك

صافي كندخلوها لفران غير شوية غير يدوب لفرماج و نخرجها

صافي هاهيا پيتزا ديالنا ساهلة و لذيذة واجدة

بيتزا بخبز التوست بالصحة والعافية

ملحوظة :

بالنسبة للجارات لي كايبقا ليهم لبطبوط زايد و كايبرد متلوحيهش

ستعمليه فپيتزا قسميه علا جوج و عمريه تيجي رطب و زوين

و بالنسبة للحشوة على حساب الرغبة ديالك ولي تشهات خاطرك

إيوا بالصحة و الراحة متنساونيش بالدعاء ديالكم

متنساوش ردود الا عجباتكم و متنساوش التصويت هههههههه

[author image=”https://lh6.googleusercontent.com/-J4AN6ByawQs/U8K1f0ugrSI/AAAAAAAAQ94/V7GCBD85yPw/s200/jara.png” ]الجارة حنان التازية[/author]