ساندويش بالعيش المصري لمحبات كل ماهو جديد

السلام عليكم جارتي اشنو رايكم نجربو هاد المرة شي حاجة
جديدة ساندويش بالعيش المصري نوجدوهوم للعشاء
او نعطيوهم لوليداتنا بنان و صحيين

نبداو بسم الله

مقادير ساندويش بالعيش المصري:

مقادير العجين :
3 كيسان دقيق
3 معلق صغار خميرة الدار
2 معالق كبار سنيدة
معلقة صغيرة ملح
كاس ماء او اكثر على حساب دقيق لي عندك

مقادير الحشوة :
بطاطا مقلية
كفتة لي بغيتي
خس مقطع
خيار مقطع
مطيشة مقطعة
مايونيز
الملح
الابزار
التحميرة
الثومة

طريقة  تحضير ساندويش بالعيش المصري :

نبداو بتحضير العجينة نديرو الدقيق و
الخميرة و و السنيدة و الملح و الماء

يقدر يكفاك غير كاس و تقدري تحتاجي
اكثر جارتي تعجنيها و دلكيها مزيان
و تخليها تخمار

وملي نلقاوها خمرات نقسموها على 8 الكريصات
ونطلقوها بالدلاك

ونطيبوه بحال كيفما كنطيبو البطبوط

وندوزو دابا للحشوة ديال ساندويش بالعيش المصري
نديرو التوابل للكفتة و نقليوها فالزيت ونديرو شوية منها
و البطاطا مقلية و الخس و الخيار و مطيشة  وشوية
المايونيز الى حبيتي جارتي

وهاهوا جارتي الحبيبة موجود كنتمانا تجربيه