بمناسبة اقتراب عيد الفطر المجيد، دفعة جديدة من حلويات العيد نقدمها لكم
وهذه المرة حلوة الكاوكاو والزنجلان من جارتكم أم هديل
كيدايرين الجارات اليومة درت هاد شكل تاع الحلوى
قلت نعطيه ليكوم وباقي غدا غندير شكل تاني
بغيتكوم تشوفو كيجات الى عجباتكوم ديروها
المقادير والطريقة
كنعجن عجينة جوج ونصف زلايف فورص
ربعة تاع زبدة شوية تاع الملح رشة وقرعة ماء الزهر باش نعجنوها
كنرمل دقيق مع زبدة مزيان وندوزو تاني فغربال
ونزيدو سكر كلاصي كاس تقريبا ومن بعد نجمعها بماء الزهر
وندلكوها مزيان ونخاليوها ترتاح انا عجنتها قبل المغرب ونحطها فثلاجة
كنشد زلافة تاع الكاوكاو محمر ومطحون بقشورو
وزلافة تاع زنجلان محمر ومطحون
ونزيد عليه جوج معالق سنيدة ونصف ملعقة تاع القرفة
وجوج معالق زبد ونجمعاها بزيت حتى نشوفها كتجمع
كنجبد عجينة تاعي من تلاجة
وندلها بدلاك مزيان
ونكونو صلقنا شوية تاع الكاوكاو تقريبا كاس
ونحيدولو لقشور ونشفوه مزيان ونحطو عليه معلقة تاع سنيدة
ونطحنو غي شوية باش نزوقو بيه الحلوة تاعنا من الفوق
ندهنو الحلوة بياض بيضة ونحطو فوقها كاوكاو المصلوق بحال هاد الشكل
وغيرت فشكل درت شكل بحال سيكار ملوي
وهاهي طابت الاولى
ونحط عليها عسل غي شوية قطارات
صورة نهائية لحلوة الكاوكاو والزنجلان
انا جاتني محمرة بزاف حيث زدت فيها معلقة تاع لعسل
فالحشو نتوما مديروهش باش متخرج محمرا بززززززاف
وبالصحة والراحة غدا نحط ليكوم الشكل التاني
[author image=”https://lh6.googleusercontent.com/-J4AN6ByawQs/U8K1f0ugrSI/AAAAAAAAQ94/V7GCBD85yPw/s200/jara.png” ]الجارة أم هديل[/author]
salam tbarklah 3lik bghit ghir nswolak wach molmkin n3jnha blma 3adi hit hna falmamanya makaynch lma zhar
Zwina tbarkalah 3liki
تبارك اللّٰه عليك كتبان غزالة
alah ya3tikom asaha wasafat jamila jidan mrc
امين ياربي و شكرا اختي
Salam ana motatabbi3a jadida 3jebni bzf le site dyalkom lah yjazikom bikhir bghit nendam likom
Salm bghit nkon sadi9a likom o bghit net3allem menkom ra maw9i3 mofid jidan
مرحبا اختي ام مسلم موقع جاراتي رهن اشارتك