شكلين من صابلي باللوز والفستق مذاق كيهبل

السلام عليكم جاراتي صابلي باللوز والفستق فالمناسبات
و ملي كيكونو الضياف عندنا كنبغيو تكون الطبلة ديالنا فيها
حليوات بشكل رائع و مذاق اروع وكذلك
تكون باقل التكاليف الممكنة

نبداو بسم الله

المقادير :

نصف رابعة زبدة
120 غرام كاوكاو او اللوز
100 غرام سكر عادي
2 معالق كبار زيت
بيضة
معلقة صغيرة خميرة الحلوة
خنيشة فانيلا
الطحين حسب الخليط
للتزيين :
شكلاط اسود
شكلاط ابيض
حبات لوز
فستق مهرمش

طريقة تحضير صابلي باللوز والفستق :

فاناء كنديرو كل من الزبدة والكاوكاو يكون محمر و مطحون
مزيان اولا اللوز لي حبيتي جارتي العزيزة و السكر سنيدة
و الزيت و البيض و الفاني

ونخدوموه حتى يولي عندنا خليط متجانس

عاد نبداو نزيدو الطحين بشوية بشوية

حتى يولي عندنا عجينة رطبة و متماسكة

ومن بعد نسرحوها بالمدلك ونديرو بين قطعتين ديال البلاستيك
بلا منستعملو الطحين باش تبقا لينا العجينة زوينة وملي يولي
السمك ديالها متساوي نجيبو المقطع لي حبينا انا ختاريت
ندير 2 اشكال من نفس العجينة الاول على شكل لوزة
خرجت بيه نصف كمية العجين

و الثاني دائري ومشنف درت بيه ما تبقى من العجين

ودرت مقطع متوسط على شكل وردة

رشمت بيها الوسط وخديت مقطع على شكل وردة صغيور
ونديرو وريدات صغار العدد ديالها قد عدد الدوائر لي درنا
ونلصقوهم فوقها

ومن بعد نديروها فطاوة مدهونة بالزيت و مرشوشوة بالدقيق

و ندخلوها لفران نكونو مسخنينو من قبل وملي طيب نخرجوها

ونخليوها تاخد درجة حرارة المطبخ ومن بعد
ندوبو الشكلاط كل من الاسود و الابيض فحمام مريم
بوحدو ناخدو لي على شكل لوزة نغطيوها من الفوق
بالشكلاط الاسود

ونديرو الوسط لوزة صاينة و فجناب نقيطات بالشكلاط الابيض

وندخلوها تبرد
وحتى الشكل الثاني ندوزوها فالشكلاط الاسود
نغطيو ليها بيه وجها كامل وندردرو فوقو البيسطاش
او الفستق مهرمش وفوق الوريدات الصغيرات نديرو
مربى اخضر لي هو مربي عادي وزدنا عليه الملون الغذائي

وندخلهم للثلاجة حتى يبرد مزيان الشكلاط
ونقدمو صابلي باللوز والفستق

بالصحة و الراحة لا تنسونا من صالح دعائكم