مسمن على شكل محنشة بحشوة الدجاج والخضر

اليوم جاراتي جيتكم بوصفة رائعة، هي وصفة المسمن على شكل محنشة ومعمر بالخضرة والدجاج . تايجي فن مذاقا ومنظرا، شهي وفنفس الوقت مغدي وتايسد الجوع

مسمن على شكل محنشة بحشوة الدجاج والخضر

نتمنى جارتي تعجبك وصفة مسمن على شكل محنشة وان شاء الله سأنشر المزيد من وصفات المعجنات قريبا ، كما أدعو الجارات اللاتي يرغبن في مشاركة وصفاتهن سواء وصفات المسمن ، الحرشة ، الغراتان … وأي وصفة إلى مشاركتنا إياها عبر منبر مشاركة وصفات جاراتي من هنا

مقادير العجينة

نصف كيلو فورص
رابعة دقيق القمح
ملعقة صغيرة و نصف ملح
نصف ملعقة صغيرة خميرة عادية
نصف ملعقة صغيرة خميرة كيماوية
الماء دافئ نجمعو بيه
زلافة فيها (زيت عادي + زيت الزيتون) باش نكرصو

الحشوة

نصف كيلو دجاج كفتة
2 فلفلات حمرين
1 فلفلة خضرة
1 فلفلة صفرة
4 بصلات صغار
كاس زيتون اخضر
2 ضروس ثومة
عشوب بحساب اللي عندنا (نقدرو مانديروهمش)
زيت الزيتون, ملح, ابزار, تحميرة, سكينجبير، خرقوم حسب الذوق

طريقة مسمن على شكل محنشة :

نطحنو الكفتة مع العشوب و الثومة و زيت الزيتون (ولا نخلطوهم غي بإيدينا و نحكو الثومة)،

نشحرو البصلة مقطعة اطراف صغيرة مع زيت الزيتون الملح و الابزار حتا تدبال لينا

و نضيفو عليها الفلفل بالالوان مقطرين اطراف صغيرة و نشحروهم حتا يطيبو

منين يطيبو نزيدو عليهم الكفتة اللي كنا خلطنا و نتبلو بالتوابل

و نديرو الهريسة لا بغينا

و نخليو الكفتة تطيب و حنا تانفرتوها بالمعلقة باش مايبقاوش اطراف كبار،

منين يطيبو نضيفو الزيتون

(من الافضل نطحنوه فالطحانة باش مايقطعش لينا الورقة و حنا تانلويو فيها)

و نضيفو شوية زيت الزيتون فالأخير و نطفيو عليها نخليوها تبرد

نوجدو العجينة، نخلطو المقادير كاملين

و نجمعوهم بالما بشوية بشوية حتا تولي عندنا عجينة متماسكة و فنفس الوقت خفيفة،

ندلكوها مزيان لمدة 10 دقائق

نبداو نڭرصو العجينة بخليط زيت الزيتون و زيت العادية،

نقسمو العجينة لكويرات صغيرة نديروهم فصينية مدهونة بالزيت باش مايلصقوش

و نغطيوهم باش مايكونوش قشرة من الفوق،

ناخدو كل كويرة نڭرصوها بالزيت مزيان نديرو وسطها سطر من الحشوة

و نثنيوها فحالا غاتصاوبو سيڭار،

و ندوروه على نفسو كيفما فالصورة باش تولي عندنا محنشة،

نضغطو عليهم شوية بإيدنا و نديروهم فلاطة مدهونة بالزيت،

ندهنوهم بالزيت و ندخلوهم للفران يطيبو و فنص الطياب ديالهم نعاودو نخرجوهم

و ندهنوهم بالزيت مرة اخرى باش يجيو محمرين،

وهاهو مسمن على شكل محنشة بحشوة الدجاج والخضر

 

نخليوهم يطيبو حتا يتحمرو و نخرجوهم و نقدموهم بالصحة و الراحة

source : uneirresistibleenviedesucre.com

تعليق واحد

  • الله يعطيك الصحة ويسهل عليك جربتوم ديك النهار جاو كيحمقو وعملت الكفتة داللحم.شكرا بزاف على مشاركتك الوصفة جزاك الله خيرا

اترك رد

Do NOT follow this link or you will be banned from the site!