كيش مالح بالدجاج

طريقة تحضير كيش مالح بالدجاج بالصور 16

السلام عليكم نتمنى اكون كلشي بخير، اليوم حضّرت كيش مالح بالدجاج وقلت نشاركو معاكم جاراتي، والمراحل مصورة إضافة إلى شرح الخطوات باسم الله نبدأ

كيش مالح بالدجاج

قائمة المحتويات

المقادير

نبدأ بمقادير العجين

زوج كيسان ونصف عنبة دقيق
بيضة ،معلقة زبدة ،ملح
رشيشة سنيدة،شوي دالخميرة الفورية
وشوية الزعتر مطحون

وتعجنيها بماء دافئ

ثم اتركيها ترتاح شوية

من بعد تسرحيها فمول دالفران وتكيها بالشوكة

ودخليها للفرن طيب نص طياب

مقادير الحشوة

الحشوة ديري اللي موجود عندك، بالنسبة للحشوة اللي عملت أنا

درت بصلة مشلظة فقليل من الزيت وقليل من الزبدة والملح والابزار

حتى ذبالت زدت علها فلفلة مقطعة صغيرة

ومن بعد ماذبالت أضفت مطيشة مقطعة صغيرة وضفت التوابل،

ملح، ابزار كركم وصوص الصوجا ونص ضامة دالبنة دالدجاج ،

وخليت كولشي تا طاب وطفيت عليه،

بالنسبة للدجاج كان عندي طايب من قبل، كان شاط ليا ،وفرتتو ،

نخرج المول من الفران، و نسرح الحشوة دالبصلة ونزيد عليها طريفات الدجاج،

من بعد نطرب ثلاثة دالبيضات،مع قليل من الملح،

ونسكبه فوق الكيش ونحك فرماج احمر من الفوق ونعاود ندخلو الفرن باش اطيب،

بالنسبة ليك جارتي تقدري ديري كفتة ،طريفات دجاج طيبهم مع الحشوة ….

لمهم للموجود عندك فالدار،

فالحقيقة جا زوين وخا زربت عليه شوي ما خليتوش تا تحمر مزيان،

انت تركيه حتى يتحمر مزيان 

بالصحة والعافية، جارتكم عائشة

لمشاهدة باقي وصفات الجارة عائشة اضغطي هنا

16 Comments

  1. لبنات سمحولي ،نسيت شوي دالزعتر فالعجينة مطحون.

  2. إيوا هاذ النهار لغدا على حيابك..الكيش…و الديسير….شكرا بزاف و الله يخليك لو عندك أي وصفة لذيذة بلا لحم بلا دجاج ﻷني حامل و سبحان الله و الله يسمحلي كرهتهم..شكرا

    1. مرحبا بيك جارتي ايمان،والله اطلق سراحك على خير وارزقك بالذرية السليمة المعافاة.حبيبة ،ممكن ديري مسمن معمر بالطون والشعرية الصينية والزيتون،قريبا غنزلها ان شاءالله ،و إل كنتي زربانة ،لعشية ان شاء الله نحطهم ليك.ورضي بالك،لتحكي شي شهيوة.

  3. kaychahi chokran khti

  4. وييييييلي يا ختي غي سكتي الشهيوات كاملين اللي فالموقع حكيتهم لغالب الله كلشي زوين ومتقون….بارك الله فيك و على خاطر خاطرك وقتما وجدتي شي شهيوة هانا معاك

    1. واهيا ،ماتبقايش دخلي لمواقع الطبخ،تا تولدي بالسلامة ان شاءالله.ناااااااري غديريها لتيلاد.والله اهديك على راسك.

  5. Zwina tbarkalah 3lik akhtity

  6. tbarkalah 3lik akhti idik kaykharjo ghachehiwat

  7. الكيش غزال والديسير كيشهي

  8. basahtak ahbiba

  9. السلام عليكم بارك الله فيكم في الحقيقة استفدنا منكم الكثير الله يعطيكم الصحة واصلوا …..

    لالة حبيبة
  10. Ana fsaraha jani alto l3jina kasha oriha dlbid zfra halto wlkin lhchwa jat bnina

  11. ولله شكرا استفدنا كتير.

  12. Mmmmm ldid

  13. جزاكم الله خيرا وصفات في مستوى تصدق 100%

    1. ياربي امين اختي

      جارتي المديرة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *