غراتان بالكرعة الخضرا

مرحبا بك جارتي العزيزة في موقعنا غراتان
بالكرعة الخضرا وصفة رائعة بالاضافة لكونها
صحية ممكن نستعملو الكرعة الخضرا اكثر ونخليو
الاطفال ياكلوها ومتبقاش كتكال فقط مع الكسكس
اولا فالشوربة والطريقة مشروحة بالصور لتسهيل
عملية التطبيق نتوكلو على الله
ونبداو بسم الله

غراتان بالكرعة الخضرا

المقادير :

نصف كيلوغرام كرعة خضرا
رابعة كفتة
150 غرام فرماج احمر
2 حبات طماطم
ملح ابزار
ربيع مقطع
ثومة
تحميرة
زيت الزيتون
2 معالق كبار طماطم معلبة

طريقة تحضير غراتان بالكرعة الخضرا :

كنحضرو صلصة الطماطم هي الاولى فمقلة
كنديرو زيت الزيتون ومعاه شوية الملح ونديرو
الطماطم مزولين ليها القشور ومقطعة مكعبات
ونحركوها ونزيدو عليها الربيع مقطع وراس واحد
ديال الثومة محكوك و التحميرة وطماطم معلبة
ونحركوهم مزيان ونبقاو نحركو حتى تولي جاهزة
ونخليوها تاخد درجة حرارة المطبخ
وندوزو نقشرو الكرعة ونقطعوها بشكل طولي رقيق
ونستفوها فمول

ونغطيو القاع مزيان يكون مدهون بالزبدة اولا الزيت
لي عندك ونديرو شوية من صلصة الطماطم

ونصف كمية الكفتة ونعاودو نغطيوها بشرائح
الكرعة ونصبو ماتبقا من صلصة الطماطم
ونوزعو فوقها الكفتة لي بقات لينا

وفالاخير نغطيوها بالفرماج محكوك

انا عملت فالمقادير الفرماج الاحمر نظرا لانه
هو لي ممكن نلقاوه فجميع المحلات التجارية
عكس الانواع الاخرى وممكن جارتي ديري لي
متوفر عندك هذا ماشي شرط يكون هو بالذات
والمرحلة ماقبل الاخيرة نغطيو المول بورق الالومينيوم

مزيان وندخلوه للفران ونخليوه لمدة نصف ساعة
تقريبا الى ساعة الا ربع عاد نقلبوه واش واجد
اولا لا ممكن ياخد وقت اكثر من هذا وملي يوجد
نحيدو ورق الالومينيوم ونخليوه يتحمر شوية
من الوجه ديالو ونقدمو غراتان بالكرعة
الخضرا دافي بالصحة والراحة

ان شاء الله يعجبكم وتقدموه بكل فرح لعائلتكم
ولحبابكم ونالو نصيب من صالح دعائكم
ولاعز الناس بالشفاء العاجل ولصاحبة الوصفة
الاخت فاطمة جزاها الله عنا كل خير

في امان الله

5 4 PT15M PT50M
غراتان وصفات رمضان

4 تعليقات

اترك رد

Do NOT follow this link or you will be banned from the site!