طريقة تحضير عجينة الكيش واقتراح حشوة جد لذيذة

السلام عليكم جاراتي الغزالات عجينة الكيش مكتنجحش
لينا ديما وكل واحد وطريقة التحضير لي كيستعملها باش
تخرج ليه هشة و كذوب فالفم ان شاء الله تعجبكم هاد
الطريقة و تبقاو ديما ديروها وتفرحو بيها وليداتكم و تقدرو
تحطوهم كاطباق مرافقة ملي تكون شي مناسبة اولا ملي يكونو
عندكم الضياف وتا الشكل ديالها صغير الحجم وجميل جدا
نبداو بسم الله

عجينة الكيش

المقادير :

مقادير العجين :
رابعة طحين ابيض
نصف رابعة زبدة بدرجة حرارة المطبخ
اصفر بيضة
القليل من الملح
معلقة صغيرة خميرة الحلوة
القليل من سكر سنيدة
الماء من 2 تال 3 معالق كبار ويكون ماء بارد من الثلاجة

الحشوة (اختيارية ):
طماطم
بصل
فطر ماكول معلب او طري
فلفل اخضر
قيمرون
قزبر
التوابل
بيضة كاملة واصفر بيضة
2 معالق كبار قشدة طرية او
ياغورت طبيعي حسب المتوفر

120 مليليتر حليب
ملح
ابزار

طريقة تحضير عجينة الكيش وكيفية تقديمه بشكل راقي:

نخدمو عجينة الكيش هي الاولى فقصرية
كنديرو الطحين و الزبدة

ونخليو الزبدة تخلط مع الطحين بلاما نعجنوها
وحنا كنبسبسو فيهم و ملي يتخلطو مع بعضياتهم نزيدو
السكر و الخميرة واصفر البيض

ونخلطوهم ونجمعوها بالماء البارد نجمعوها

بلاما ندلكوها بالمرة غتجيك غريبة وبالخصوص الحادكات وليني ملي
كنديروها فالثلاجة من بعد المدة ديال 6 سوايع او اكثر ملي كتبغي
طلقي بالمدلك كتكون هي هاديك تقدري توجديها حتى يوماين اولا ث
لاثة ايام قبل ماتخافيش منها وليني مديريش فيها اصفر البيض وتقدري
تزيدي فيها اعشاب منسمة بحال الزعتر اولا لي كان عندك او تقدري
تزيدي حتى الفرماج مجكوك

ونوجدو الحشوة انا درت هادي اختيارية شحرت البصلة
مقطعة مكعبات و زدت عليها الفلفلة حتى هي مكعبات وملي
ترخاو زدت عليهم مطيشة و الفطر وشوية الملح و الابزار و من
الاحسن قدما كانت المح قليلة احسن باش دوقي الطعم ديال
المكونات كاملة وتستمتعي بيها وفالاخير نزيدو القيمرون حكاش
مكيبغيش طياب بزاف وملي طيب نخليوها على جنب تبرد شوية

ومن بعد فزلافة نخلطو البيض و القشدة الطرية او اليوغورت على
حساب لي عندنا و الملح و الابزار

و نطربوهم عاد نبداو نزيدو فالحليب
وحنا كنطربو حتى يولي خليط متجانس

ومن بعد نجبدو العجينة تاخد درجة حرارة المطبخ

ونطلقوها بالدلاك فوق سطح مرشوش بالطحين مزيان
ونقطعوها بمقطع صغير انا خذيت على شكل وردة

ملي نكملو العجينة ديالنا كاملة نستفوها فمول
يكون ديال الكاب كيك باش يعطينا
هاد الشكل لي بحال فالصور

وملي نكملو الكمية ديال العجينة كاملة لي عندنا نستفوها فالمول

نعمرو عجينة الكيش بالحشوة ديالنا

ونكوبو عليها خليط البيض و الحليب

وندخلوها لفران يكون سخون مزيان وملي يقرب
يطيب نديرو فوق كل وحدة شوية الفرماج محكوك

ونقدموها بالصحة و الراحة

8 تعليقات

اترك رد

Do NOT follow this link or you will be banned from the site!