طاجين سردين كفتة زوين ولذيذ بطريقة ساهلة

وصفة طاجين سردين كفتة سهل ولذيييذ من الجارة أم هديل

الجارات لاباس عليكوم وكنشكر كل لي صوت ليا وعجبوه وصفات تاعي

اليوم جبتليكوم طاجين كفتة تاع سردين طريقة زوينة وبنينة

ممكن بعض الناس مداروهاش وكنتمنى تجربوها كتجي رائعة

والله كل لي كلاه عندي كيحمااااااااق عليه

نبداو بسم الله

المقادير مع طريقة التحضير

كنشد سردين نقيه مزيان ونغسلو ونقطرو

ونحطو فتلاجة شي نصف ساعة

كنجبدو ونطحنو فطحانة اليدوية بحال هاد الشكل

الى كان سردين غليظ وكبير ممكن تحيدي ليه قشرة فوقانية انا درت غي نصف كيلو

ونحك عليه نصف خيزوا ونصف قرعة ونصف بطاطة ومعدنوس بحال هاد الشكل

والتوايبل جوج ريوس ثومة زعفران تحميرة كمون لبزار عصير حامض ملح

انا مكنحطش فيها شحمة ولا مكنديرش روز حسب الرغبة لكي الاختيار

ونشد بصلة صغيرة نشلظها فالطاجين انا درت طويجين صغير هههههه وملح وزعفران وزيت بلدية والعادية

يتقلى مزيان ونحك مطيشة عليهوم

انا درت غي وحدة وندير نفس التوايبل لي درت فلكفتة

ونخلطهوم مع بعضياتهوم

ونحط فوقها شوية تاع فلفلة حمرا وخضرا مقطعين

وندير كفتة كويرات نستفهوم بحال هاد شكل

ونستف تاني فلفلة حمرا وخضرا وزيتون

وحامض وحاطيت ريوس ثومة بقشورها

كتجي بحل المخ فاش كطييب ممممم وفيفلات حسب الرغبة

ونخاليه يطيب على نار مهيلة

وها طاجين سردين كفتة طااااااااااااب على مزيناتو لذيذذذذذذذذ


وبالصحة والراحة كنتمنة تجربوووووووه

متنساوش تصوتوليا ههههههههههه الى عجبكوم

[author image=”https://lh6.googleusercontent.com/-J4AN6ByawQs/U8K1f0ugrSI/AAAAAAAAQ94/V7GCBD85yPw/s200/jara.png” ]الجارة أم هديل[/author]

24 تعليق

اترك رد

Do NOT follow this link or you will be banned from the site!