شوصون بسلمون مدخن والسبانخ بالطريقة والصور

مرحبا بكن جاراتي شوصون بسلمون مدخن والسبانخ وصفة
مقدمة بطريقة جد سهلة ومصورة وهي وصفة لذيذة
ان شاء الله ممكن تقدميها فالعشاء اولا كطبق جانبي
فالمناسبات والمكونات ديالها غنية وصحية نتوكلو على الله
ونبداو بسم الله

شوصون بسلمون مدخن والسبانخ

المقادير :

مقادير العجينة :
410 غرام طحين
3 معالق كبار زيت الزيتون
130 غرام ياغورت طبيعي
معلقة صغيرة ملح
نصف معلقة سكر صقيل
معلقة صغيرة ونصف خميرة الخبز
ماء دافي
مقادير الحشوة :
2 حبات بصل
2 حبات فلفل
علبة فطر
200 غرام سمك سلمون مدخن
سبانخ
قشدة طرية
زيت الزيتون
فرماج
ملح
ابزار
سكينجبير
ريحان مجفف
ثوم بودرة
اعشاب جافة

طريقة تحضير شوصون بسلمون مدخن والسبانخ :

فقصرية نديرو الطحين والملح ونحركو ونزيدو عليه الياغورت
والسكر والزيت وفالاخير الخميرة فحالة كانت عندك
خميرة الخبز لي حبوب دوبيها فالما ومن بعد زيديها
ونخلطو كلشي ونبداو نعجنو ونزيدو الما بشوية
بشوية ونبقاو ندلكو حتى تولي العجينة ديالنا رطبة
ومدلوكة مزيان ويلا كانت كتلصق شي شوية ماشي
مشكل من بعد نغطيوها ونخليوها فبلاصة دافية ترتاح
وتخمار لمدة مابين ساعة اولا ساعتين حتى تبان
ليكم الحجم ديالها ولا مضاعف

ونمرو للمرحلة الثانية لي هي تحضير الصلصة والحشوة
فمقلة نديرو زيت الزيتون والبصلة لي نكونو مقطعينها
مكعبات وملي ترخا وتولي ذهبية اللون نزيدو عليها الفلفلة
مقطعة مربعات ومن بعد نزيدو عليها الملح والابزار وملي
تبدا طيب نزيدو عليها الفطر معلب مقطع وشوية
سكينجبير ونخليوها طيب لمدة دقائق

ومن بعد نخليوها على جنب وفمقلة اخرى نديرو فيها
زيت الزيتون ونديرو فيها سبانخ مقطعين على نار
متوسطة وملي يدبالو نزيد عليهم شوية الابزار
والثوم بودرة ونحركوه مزيان

وملي طيب نخليوها جنب وبالنسبة للصلصة نخلطو
القشدة الطرية وصلصة الطماطم فكسرونة ونزيدو عليهم
الملح والابزار ونسخنو الخليط لدقائق

ونحتفظو بيه  على جنب وندوزو للمرحلة
ما قبل الاخيرة ناخدو العجينة

ونقسموها لكويرات متساوية الحجم

ومن بعد كل كويرة نسرحوها بالدلاك فوق طبلة مرشوشة
بالطحين مزيان باش ملي نبداو نعمروها متلصقش
ونخليوها على شكل دائرة

نبداو اولا ندهنو نصف الدائرة بصلصة لي كتكون
من الطماطم والقشدة الطرية ومنقربوهاش لجناب باش
ملي نبغيو نسدو جناب تكون سهلة

ومن بعد نزيدو عليها السبانخ وخليط ديال البصلة
والفلفلة وقطعة ديال سلمون

والفرماج

ومن بعد نسدو شوصون ديالنا من جناب
اما بالبيض او الماء

ونتقبوها بالفورشيطة اولا نجمعوها
باصابع ديالنا

ومن بعدو نستفوهم فوق طاوة مغطية بورق الفرن
وندهنو الوجه ديالهم بصلصة الطماطم والكريما
ونتقبوها بشوكة

ونرشو فوقهم الريحان واعشاب جافة

وندخلوها طيب لفرن درجة الحرارة ديالو 200 حتى
يولي اللون ديالو مذهب

ونقدمو شوصون بسلمون مدخن والسبانخ
بالصحة والراحة

كنتمنى يعجبكم وتجربوه ونالو نصيب من صالح
دعائكم ولصاحبة الوصفة ونتمناو لجميع مرضى
المسلمين بالشفاء العاجل

المصدر : uneirresistibleenviedesucre.com

تعليق واحد

ترك تعليق