سلطة بثلاث انواع الفلفل والجبن

سلطة بثلاث انواع الفلفل والجبن سهلة التحضير 1

سلطة بثلاث انواع الفلفل والجبن صحية ومنعشة مقدمة
بطريقة سهلة جدا كتليق للعراضات الا كانو عندك ضياف وممكن
تحضريها فبيتك الا كنتو من محبي الفلفل والجبن نتوكلو على الله

سلطة بثلاث انواع الفلفل والجبن

المقادير :

3 فلفلات حمرات
3 فلفلات صفرات
3 فلفلات خضرات
400 غرام جبن البقر اولا الماعز
3 عراش قزبر
25 سنتيليتر قشدة طرية
3 ورقات جيلاتين
ملح
ابزار

طريقة تحضير سلطة بثلاث انواع الفلفل والجبن :

اول حاجة نبداو بيها فعملية التحضير ناخدو الفلفل الكمية كاملة
لي عندنا نغسلوها ونحيدو الزوائد والزريعة لي فيه وحتى المناطق
البيضاء لي فيها ونقطعوها شرائح عريضة يعني ممكن كل حبة فلفل
تعطينا 4 اولا 5 شرائح بالاكثر ومن بعد نخليوها طيب فالبخار لمدة 10
دقائق ونخليوها تبرد ملي طيب وفاناء كبير نكوبو عليها زيت الزيتون
والملح والابزار ونخليوها تشربهم لمدة 5 دقايق وناخدو زلافة اولا كاس
كبير نديرو فيها الما يكون بارد مزيان ونحوطو فيه ورق الجيلاتين والمحل
لي تاخديه من عندو قوليه يعطيه ليك ديال البقري وناخدو كاسرونة
نديرو فيها القشدة الطرية ونخليوها تغلى ونحيدوها من فوق العافية
ونجيبو الجيلاتين لي غتكون ترخات ونصفيوها من الما لي كانت فيه
ونديروها دوب فالكريمة وحنا كنحركو بمعلقة وفاناء اخر كنديرو الجبن
لي عندنا ونمعسوه بفورشيطة  ونزيدو عليه الكريمة ونبقاو نحركو
مزيان حتى يولي خليط متجانس

وناخدو الصينية تكون مربعة وطويلة ندهنوها بالزيت مزيان ونقسمو
الخليط ديال الجبن والكريمة على جوج نديرو الجزء الاول لتحت ونفرشو
فوقو الفلفلة طرف احمر حداه اخضر حداه اصفر ونبقاو بالتناوب بحال
هاكا حتى نغطيو الوجه ديال الكريمة والجبن كامل

ونديرو الطبقة الثانية من الخليط وفوقها قطع الفلفل

وندخلوها للمجمد تبات ليلة كاملة وداكشي لي بقا ديال الفلفلة نقطعوه
مربعات صغار والنهار التالي ناخدو القزبر نغسلوه ونقطعوه رقيق مزيان
ونخلطوهم مع بعضهم ونحيدو السلطة ديالنا من المول ونحطوها فطبق
التقديم ونحطو من فوقو الفلفلة لي قطعناها وخلطناها مع القزبر

ونقدمو سلطة بثلاث انواع الفلفل والجبن

بالصحة والراحة

كنتمنى تعجبكم وتجربوها ونالو نصيب من صالح دعائكم
وصاحبة الوصفة وايضا لاغلى الناس بالشفاء العاجل

المصدر : www.aacook.fr

One Comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *