تحضير بانيني في البيت سهل واقتصادي

مشاركة ثانية من الاخت مــرام في منبر مشاركات جاراتي ، هذه المرة وصفة تحضير بانيني في البيت ، بمقادير بسيطة ومتوفرة وطبعا فهو صحي وتحضير يديك تعطيه للعائلة والوليدات بأمان

بانيني في البيت

بانيني في البيت صحي وبنين وصفة جربتها فرمضان بانيني وحاولت يكون بحال لي كيتباع فالسناك العجينة نقلتها من عند الشاف حورية , وهاهو تطبيقي للوصفة بالصور والمراحل

المقادير :

العجينة ديال بانيني فيها الدقيق الكمية لي بغيتي
4 المعالق زيت زيتون
سنيدة
ملح وخميرةحسب الجو
ماء للعجن

مقادير الحشوة :

مطيشة
خس
سردين معلب
فرماج اي نوع متواجد في البيت

طريقة تحضير العجين :

كنديرو فالقصرية الطحين و 2 معالق زيت زيتون ونبسبسوه وعاد كنزيدو الخميرة والسكر و الملح

ونعجنو عجينة تكون رطبة وتلصق لينا فايدينا شي شوية

ودوك زوج معالق لي بقاو ديال زيت الزيتون نديروه فالقصرية ونعجنو فيه العجينة

و نغطيها ونخليها تخمر مزيان ونديرها على شكل كوميرات اولا كريصات صغار بحال البطبوط

ونديروه فطاوة واخا مدهنيهاش مكيلصقش الا خفتي يلصق رشي الطاوة بشوية الطحين

ونخليو الكوميرات ديالنا يخمارو عوتاني بيلما سخن الفران وندخلوهم ميطيبوش بزاف

خاصهم يبقاو رطبين لأن باقين غيكملو طيابهم فالماكينة ديال البانيني كيفما هو معروف

وفهاد الوقيتة نقطعو كل من مطيشة و الخس والفرماج رقاق

ويلا كان عندك فرماج مثلث تاهوا زوين

كنخرجو الخبز ديالنا من الفران كنخليوه يبرد ونديرو طريفات ديال مطيشة وشوية الخس

والسردين كنفرتو باش الكمية تكفاني وندير الفرماج ونجمع الكوميرة ديالي

والحشوة تقدري ديري لي بغيتي

يلا بقا ليك شي حاجة من البانيني بلا حشوة ديريها فالمجمد وقتما بغيتيه جبديه حتا يترخا شوية وعمريه عادي

وندير خبيزات البانيني تحمار فالماكينة ديال بانيني وملي كتحمر الجهة الأولى كنديرها فالعكس

 وممكن نخليه حتا كيبرد عاد نقدموه بالصحة والراحة

كنتمنا تجربوه ومتنساوناش من صالح دعائكم الا عجبكم

جارتكم الوفية مــرام

7 تعليقات

اترك رد

Do NOT follow this link or you will be banned from the site!