بطبوط معمر بصدر الدجاج

اهلا وسهلا جارتي بك في بيتك الثاني
للتغيير حضرنا هاد المرة وصفة من عند
الاخت فاطمة صاحبة موقع fatimato cuisine
بطبوط معمر بصدر الدجاج مقدم بكيفية بسيطة
جدا ومشروحة بالصور بلامانطول عليكم
نتوكلو على الله ونبداو بسم الله

بطبوط معمر بصدر الدجاج

المقادير:

مقادير العجين :
500 غرام طحين ابيض
ماء
خميرة الخبز
ملح
مقادير الحشوة :
شعرية صينية
رابعة صدر الدجاج
ملح
سودانية
تحميرة
ضامة البنة
فرماج

طريقة تحضير بطبوط معمر بصدر الدجاج :

فقصرية نديرو الطحين والخميرة ونعجنوهم مزيان
عاد فالاخير نزيدو الملح وندلكوها ونخليوها ترتاح
بيلما وجدنا الحشوة اول حاجة نديرو الما يغلى
مزيان ونصبوه فشي اناء ونغطسو فيه الشعرية
الصينية ونشحرو صدر الدجاج فالمقلة مع زيت الزيتون
والملح والابزار من بعد منقطعوه مكعبات صغار
ونبقاو نحركوه حتى يطيب مزيان ونصفيو الشعرية
الصينية من الما ونقطعوها حتى هي منخليوهاش
طويلة وونزيدو عليها صدر الدجاج والتوابل لي هي
الملح الابزار التحميرة السودانية اولا الهريسة ومربع
ضامة البنة ونخلطوهم مع بعض حتى توزع التوابل
على المكونات كاملة

من وراها ندوزو ناخدو العجينة ونقسموها
على جوج ونرشو السطح فين غنخدمو
بالدقيق مزيان ونسرحو فوقو الجزء الاول
ديال العجينة بالدلاك ويكون رقيق شوية

ونحطو فالوسط ديالو معلقة كبيرة ديال
الحشوة وطرف ديال الفرماج ونخليو مابين
كل جوج اماكن حطينا فيها الحشوة
بضع سنتميترات ونكملو بحال هاكا

حتى نغطيو العجينة كاملة وناخدو الجزء الثاني
ديال العجينة ونسرحوه وناخدوه ونديروه فوق
الجزء الاول ديال العجينة ونضغطو على جناب
مزيان باش ملي يتقطع منلقاوش معاه مشكل
بالمرة ومتفكش لينا ونجيبو مقطع اولا زلافة
ونقطعو بيها

ونديرو المقلة الثقيلة تسخن مزيان

عاد نبداو نطيبو من جناب بجوج ونخليو لي بقا
من العجينة يرتاح باش نعاودو نفس العملية
ومنضيعوهاش وملي نكملو الكمية ديالنا كاملة
ممكن تقدمي بطبوط معمر بصدر الدجاج دافي

فوجبة اللمجة اولا فالعرايض ديالك لناسك
وحبابك بالصحة والراحةكنتمنى يعجبكم
ونالو نصيب من صالح دعاءكم ولاغلى الناس
بالشفاء العاجل ولصاحبة الوصفة الاخت فاطمة
جزاهاه الله عنا كل خير

في امان الله

2 تعليقان

اترك رد

Do NOT follow this link or you will be banned from the site!