بطبوط معمر بالكاشير والطون

 السلام عليكم جاراتي الغزالات ان شاء الله
تكونو بخير وعلى خير وصفة اليوم من موقع
مطبخ ليلى كاميل جزاها الله عنا كل خير مقدمة
بطريقة جد سهلة وبالصور لتتمكن من تحضيرها
المحترفة والمبتدئة والمكونات هي فقط كاقتراح
ممكن تخليه كيفما هو وممكن تغيريه على حسب
الرغبة ديالك ولي كيتشهاوه حبابك
نتوكلو على الله ونبداو بسم الله

بطبوط بالطون والكاشير

المقادير :

مقادير العجين :

250 غرام قمح اصفر
كاس كبير فورص
ملح
ماء دافي
معلقة كبيرة خميرة الخبز
مقادير الحشوة :
حبة فلفل
علبة سمك معلب
زيتون
كاشير
جبن
فرماج مثلثات
ملح
خص

طريقة تحضير بطبوط معمر بالكاشير والطون :

فقصرية نديرو القمح والفورص والخميرة

ونجمعو العجينة بالما دافي وندلكوها
مزيان حتى تولي العجينة رطبة وليني
مجموعة وعاد فالاخير نزيدو الملح
ونعجنوها حتى تدخل الملح وتندمج
مع العجين

ونغطيوها ونخليوها على جنب فمكان
دافي تخمار كاين جوج طرق باش تخدميها
من بعد ما تخمار يا ديريها قريصات صغار
وتطيبيها فالمقلة الثقيلة اولا تاخدي العجينة
كاملة لي حضرتي وتسرحيها فوق سطح
مرشوش مزيان بالدقيق اولا القمح بالدلاك
وتخليها سميكة نوعا ما وتقطعي بكاس اولا زلافة
وتخليهم فشي صينية يرتاحو مدة 30 دقيقة وعاد
تبداي طيبي فيها فالمقلة الثقيلة ونوجدو الحشوة


ناخدو الفلفلة ونشحروها فالمقلة فزيت الزيتون
والملح والابزار وملي تدبال نزيدو عليها السمك
المعلب والكاشير يا مقطع يا محكوك لي بغيتي
جارتي والجبن

وناخدو بطبوط ونفكوه ونديرو فيه معلقة من
الحشوة كبيرة ونزيدو عليه الخس والزيتون
اخضر او اسود حسب الاختيار وقبل من هادشي
ندهنوه بالفرماج مثلثات ونقدمو بطبوط معمر
بالكاشير والطون

بالصحة والراحة كنتمنى يعجبكم و
تقدموه لاحبابكم بكل فرح ونالو نصيب
من صالح دعائكم وبالشفاء لاعز الناس


ولصاحبة الوصفة الاخت ليلى جزاها
الله عنا كل خير

في امان الله

ترك تعليق