بريوات بالخضرة والكفتة بالطريقة و الصور

السلام عليكم جاراتي العزازات ان شاء الله تكونو على خير بريوات بالخضرة والكفتة
بغيت نشاركها معاكم من عند الاخت كريمة جزاها الله كل خير عنا لانها
سهلة التحضير مكتحتاجش عناء كبير و الحشوة اختيارية من طبيعة الحال
يعني تقدري تزيدي عليها تقدري تنقصي منها
نبداو بسم الله

بريوات بالخضرة والكفتة

المقادير :

الكفتة او اي نوع من اختيارك
حبة طماطم
حبة بصل
فلفلة حارة صغيرة
الفطر المأكول
حبة بطاطس
فرماج ساندويش
زيت القلي
الملح
الابزار
سكينجبير
الخرقوم
تحميرة
قزبر ومعدنوس
ورقة البسطيلة

طريقة التحضير :

فمقلة نشحرو البصلة مشلضة رقيقة مزيان ومطيشة حتى هي نكونو قطعناها
مكعبات وفليفلة حارة نقطعو نصها قطع رقيقة والفطر المأكول والكفتة انا هنايا
ختاريت ديال البقري وعاد التوابل دياولنا الملح الابزار التحميرة الخرقوم
وسكينجبير والقزبر والمعدنوس

ونخليوهم حتى ينشفو من الماء مزيان ويعقادو مع التحريك
المستمر باش يندمجو المكونات مع بعضياتهم

ونكونو فهاد الوقيتة صلقنا البطاطا و عاد نقطعوها ونزيدوها فالمقلة ديالنا

ونحركو كلشي مزيان

وناخدو الورقة ديالنا ونقسموها على جوج اجزاء

ونديرو فكل وريقة شوية الحشوة وطريف ديال فرماج السندويتش

ونبداو نلويو على شكل بريوات وهنا الطريقة
موضحة مزيان لي مكتعرفش تلوي البريوات

وندهنو الطرف الاخير لي بقا بالبيض مطرب اولا شوية الطحين
مخلط مع الما باش ميتفكوش ملي يكونو يطيبو

ممكن انكي نديريهم فكيس غذائي ونخليوهم فالمجمد

حتى نحتاجهم عاد نطيبوهم اولا نبداو نطيبوهم ديك الساعة
ومن بعد نديرو زيت القلي  يسخن مزيان و نبداو نقليو

ملي نبداو فهاد العملية من الاحسن نقصو من العافية شوية تولي متوسطة
باش يطيبو بريوات بالخضرة والكفتة بطريقة متساوية وعلى الوجوه
ديالها بجوج وهاهوما بالصحة والراحة

كنتمنى تجربوهم ويعجبوكم
وتدعيو مع صاحبة الوصفة بالخير

8 تعليقات

اترك رد

Do NOT follow this link or you will be banned from the site!