منشورة من طرف جارتي المديرة

قطايف معمرين بالدجاج

السلام عليكم حبيباتي الغزالات ان شاء الله
تكونو بخير وعلى خير جبت ليكم هاد المرة
قطايف معمرين بالدجاج مقدمين بطريقة
رائعة سهلة التحضير وصحية لعشاء لذيذ جدا
ومن طبيعة الحال اقتصادي غنشرح ليك
الطريقة هادشي فالطريقة ان شاء الله
بلامنطول عليكم نتوكلو على الله
ونبداو بسم الله

قطايف معمرين بالدجاج

المقادير :

مقادير البغرير :
250 غرام سميدة رقيقة
نصف لتر ماء
3 ملاعق كبار طحين
القليل من الملح
1 ملعقة كبيرة خميرة الخبز
2 اكياس خميرة كيمياوية
مقادير الحشوة :
200 غرام لحم الدجاج
1 حبة بصل
1 معلقة كبيرة قزبر ومعدنوس
ملح
ابزار
سكينجبير
خرقوم
نصف كاس زيت
4 مثلثلات فرماج

طريقة تحضير قطايف معمرين بالدجاج :

اولا نحضرو البغرير فالخلاط الكهربائي نعملو الماء
ونضيفو عليه السميدة والدقيق الخميرة الكيميائية
وخميرة الخبز ونطحنو الكل وحتى يولي عندنا
خليط متجانس عاد نزيدو فالاخير الملح ونديرو دورة
ونفرغوه فاناء ونخليوه يرتاح بيلما وجدنا الحشوة

فمقلة نديرو البصلة تشحر مع شوية الزيت ومليحة

ملي بعد منقطعوها مكعبات ونزيدو عليهم
التوابل الابزار سكينجبير والخرقوم عاد نضيفو
الدجاج مقطع على شكل مكعبات ونبقاو نحركو
مزيان ملي نقربو نحيدوه نضيفو القزبر
والمعدنوس مقطعين رقاق ونحركو مزيان
نحيدوه من فوق العافية

ونضيفو الفرماج

ونحركو مزيان ودابا نبداو نطيبو البغرير
نسخنو المقلة مزيان ديال البغرير ونبداو
نطيبو ونديرو حجمهم

ملي نكملو الكمية كاملة كل بغريرة نديرو
فيها معلقة كبيرة ديال الحشوة  ونعمروهم

وهوما سخان باش ملي نسدوهم من
جناب تجينا ساهلة

ناخذو طاوة ونستفو القطايف ديالنا

وندهنوهم من الفوق بالزيت

وندخلوهم للفران لي نكونو مسخنينو
مزيان غير يتحمرو ونخرجوهم ونقدمو
قطايف معمرين بالدجاج بالصحة والراحة

كنتمنى تجربوه وينال رضى واستحسان
احبابكم ونالو نصيب من صالح لدعائكم
ولاغلى الناس بالشفاء العاجل ولصاحبة
الوصفة الاخت بشرى جزاها الله عنا كل
خير في امان الله


ملحوظة :
ممكن تستخدمي البغرير لي يكون قديم
عندك شي شوية فبلاصة ما تلوحيه غير
مجرد رشي عليه شوية الماء وديريه يسخن
والدجاج لي كيبقا من المرقة مثلا اولا شي
وليمة وبحال هاكا غتكون وصفة اقتصادية بامتياز

المصدر : bouchra cuisine

اشترك بالنشرة البريدية للموقع

أدخلي ايميلك لتتوصلي بجديد الوصفات كل يوم

5 3
أطباق الدجاج وصفات البغرير

تعليق واحد

ترك تعليق