منشورة من طرف جارتي المديرة

فطيرة بالكفتة وصلصة الطماطم بالطريقة و الصور

السلام عليكم جاراتي الغاليات هاد المرة جبت ليكم وصفة جديدة
فطيرة بالكفتة وصلصة الطماطم لذيذة جدا وسهلة التحضير ومكتحتاجش
عناء كبير والمقادير من طبيعة الحال متواجدة تقريبا في كل بيت مقدمة لكم
فطيرة بالكفتة وصلصة الطماطم مشروحة بطريقة سلسة
و ايضا بالصور
نبداو بسم الله

فطيرة بالكفنة وصلصة الطماطم

المقادير :

العجينة :
280 غرام الدقيق 
معلقة صغيرة خميرة الخبز
بيضة
نصف معلقة صغيرة ملح
50 ميليلتر زيت الزيتون 
120 مليلتر حليب دافي
للتزيين :
القليل من الحليب
الزنجلان
الحبة السوداء
الحشوة :
320 غرام كفتة النوع من اختيارك
300 غرام مطيشة
3 فصوص الثوم 
قبطة صغيرة من القزبر و المعدنوس
3 معالق صغار مركز الطماطم
2 بطلات
300 غرام فطر طري
زيت الزيتون
ملح
ابزار
ثومة غبرة
فرماج

طريقة التحضير :

نخدمو العجينة كنديرو فاناء الطحين و الملح نمزجوهم
و نزيدو عليهم البيض و الخميرة و زيت الزيتون ونجمعو
عجينتنا بالحليب دافي ونعجنوها مزيان وتكون العجينة رطبة
ونخليو العجينة ديالنا ترتاح ونوجدو الحشوة ديالنا
 فمولينيكس كندير الربيع و الثومة
ونطحنوهم
ونزيدو عليها مطيشة مقطعة على أربعة و مقشرتهاش
باش نستافد من كلشي لي فيها
ونعاودو نطحنو كلشي مزيان
ومن بعد نجيبو مقلة نديرو فيها زيت الزيتون
والخليط لي طحنا ونزبدو مركز الطماطم و الملح و الابزار
و نخلطو كلشي مزيان ونحركوه مزيان لمدة 15 دقيقة
ونحركوها مرة مرة ملي غتنقص الكمية ويطيب الخليط نحيدوه
من فوق العافية ومنساوش نذوقوه واش خاصو الملح
أولا الا كان حامض نزيدو عليه شوية السكر
ونجيبو مقلة أخرى فيها الزيت البلدية و البصلة ديالنا
لي قطعناها ونزيدو عليها الابزار و الملح
ونبقاو نحركوها حتى تولي ذهبية
وكنزيدو عليها الكفتة ممكن ديري جارتي ديال
البيبي أولا البقري او الدجاج انا ختاريت ديال الدجاج
ونزيدو التوابل ديالنا ونحركو مزيان ونفرتتو الكفتة ديالنا
ومنخليو حتى قطعة كبيرة وملي كطيب الكفتة مزيان
كنزيدو الفطر ديالنا
فحالة كان طري وهو موجود فالاسواق التجارية الكبرى مكانش
عندك ممكن ديري جارتي المعلب وفحالة مكانش بالمرة ممكن
تستغناي عليه وملي تلقاي الفطر طاب
طفي عليه العافية وخليه حتى يبرد ومنساوش
ندوقو نشوفو اشنو خاصها لي نقدرو نزيدوه أولا نعدلو فيه
ودابا المرحلة الأخيرة من التحضير كنحطو العجينة ديالنا فوق
سطح مرشوش بالطحين
ونقسموها على جوج
وكورة تكون كبر من الأخرى
والكبيرة هي لي غتكون من التحت
نسرحو العجينة ديالنا بالدلاك ونحولو نخليوها تبقا بشكل دائري
وتكون اكبر من المول لي عندنا وفالمول كندهنوه
بالزيت الا كان عندك جارتي الورق ديال الطبخ غيكون من الاحسن
ونخليو العجينة شوية طالعة فوق جناب ديال المول
كنتقبو العجينة بفورشيطة و ندهنوها بصلصة الطماطم لي وجدنا
وفوقها قطع الفرماج
ومن بعد الكفتة و الفطر
و فوقها الفرماج
ونغطيوها بالكورة الثانية ديال العجينة
نكونو طلقناها بالدلاك
ونجمعو الجناب بفورشيطة أولا بصبعانك بالطريقة لي كتفضلي
وكتقطعي الجناب لي زايدين
وكندهنوها بالحليب من الفوق
وبسكين صايبت انا هاد الشكل
وزينت  فطيرة بالكفتة وصلصة الطماطم بهاد
الطريقة بالزنجلان و الحبة السوداء
وندخلوها الفران حتى طيب
و هاهيا بالصحة و الراحة
كنتمنا تعجبكم و تجربوها 

اشترك بالنشرة البريدية للموقع

أدخلي ايميلك لتتوصلي بجديد الوصفات كل يوم

5 2
أطباق الدجاج اطباق الديك الرومي الفطائر شهيوات شهر رمضان قسم الطبخ والاطباق وصفات سريعة وصفات سهلة وصفات مثالية للعشاء

2 تعليقان

ترك تعليق