بسطيلة بالدجاج واللوز ساهلة بزاف ورائعة

اليوم جبت ليكم جاراتي بسطيلة بالدجاج واللوز بنينة وساهلة بزاف

بسطيلة بالدجاج واللوز أنصح بها المبتدئات في مجال الطبخ

بسطيلة بالدجاج واللوز

نبداو بسم الله

مقادير بسطيلة بالدجاج واللوز

كيلو لوز
نصف كيلو سنيدة
قرفة – ماء الزهر
كيلو و نصف دجاج بايت ليلة كاملة (قد ماكان بايت بزاف مزيان فالتلاجة )
2 بصلات مشلضات رقاق مزيان
زعفران حر
ملح – ابزار – سكنجبير
كيلو ورقة البسطيلة ( خرجات ليا انا تقريبا جوج بسطيلات من الحجم المتوسط)

طريقة التحضير :

ناخدو اللوز لي عندنا نديروه يتسلق

الى بغيتي جارتي تفسخي اللوز بسرعة تحطي شوية اللوز فوق كتانة

وكتجمعي الكتانة عليه وديري بحال كتمسحيه

بحال هاكا كتفسخي بزاف فوقت قصير جدا

الا مكنتيش زربانة خليه ليلة كاملة باش ينشف مزيان من الما

ويلا كنتي زربانة تمسحيه بكتانة او مشوار ديال الكوزينة باش

مايطيرش عليك الزيت ملي تبغي طيبي اللوز و ميحرقكش

نديرو الزيت يسخن مزيان ونرميو اللوز

مرة مرة نحركوه ونردو معاه البال باش مايتحرقش

يبدا يحمار نحيدوه

كنديرو اللوز فمكينة ديال الطحين ونزيدو عليه سكر سنيدة فكيلو ديال اللوز

نديرو نصو سنيدة وكيبقا على حساب الدوق ديالك جارتي

نزيدو عليه القرفة و ماء الزهر ونخلطوهم مزيان

دابا ندوزو الدجاج ناخدو 2 البصلات مشلضات نشحروهم فالزيت و شوية الملح

وناخدو الدجاج ونحيدو ليه الجلدة كاملة

وكنديروه يتشحر مع البصلة

و ملي يشد راسو شوية بنداو نديرو التوابل سكنجبير الابزار معلقة صغيرة عامرة بحال هاكا

الملح من الاحسن يكون غير شوية و خنيشة صغيرة ديال الزعفران الحر

كافية باش تعطينا اللون و المذاق الرائع

وكنزيدو الما حتى بتغطا الدجاج

كنسدو عليه ملي كنحسو بيه طاب كانهزو الدجاج ونديروه

فشي طبسيل باش يبرد

والمرقة نخاليوها فوق البوطة حتى تعقاد

من بعد كنحيدو لدجاج العظام و العروق لي كيكونو فيه و

كنخويوه فالماعون لي كنا خلينا فيه المرقة تتعقاد ونخلطو مزيان

ونزيدو القرفة و السنيدة و نخلطو مزيان

  وهاهوا الدجاج و اللوز واجدين

دابا اخر مرحلة وهي نقادو هادشي

ناخدو صينية نحطو ورقة الوسط و ربعة الورقات فجناب ديالها

كنفرشو اللوز هو الاول

كنديرو فوقو ورقة اخرا ديال البسطيلة ونديرو فوقها الدجاج

كنبقاو نعاودو فالعملية حتى كنوصلو 4 طبقات ومكانكتروش

الحشوة بزاف فكل طبقة  وملي كنسليو كنجمعو جناب ديال الورقة

و ندهنوها بالبيض  مطرب وكندهنو ورقة كاملة من جهة وحدة ,

الجهة المدهونة كنحطوها فوق البسطيلة ديالنا و كنلصقو

جناب بالبيض وكانقادوها الا كان شي جهة خاسرة

كنديروها فالفران طيب تبان لينا الورقة تحمرات نخرجوها

حكاش داكشي لي الداخل كلو طايب مزيان

وللتزيين انا درت القرفة و سكر كلاصي و خليت شوية اللوز

كنغربلو السكر كلاصي  فوق اليسطيلة حتي كتغاطا كاملة

ونديرو القرفة على شكل مربعات وفكل قنت ديال المربع نبتو لوزة

و هذا هو الشكل النهائي ديال بسطيلة بالدجاج واللو

جارتي بالصحة و الراحة

17 تعليق

نشر تعليق جديد

ايميلك لن يتم نشره
جاري ارسال التعليق ...