السلام عليكم جاراتي ان شاء الله تكونو بخير وعلى خير بغيت نشارك معاكم
وصفة ضلعة معمرة بالكبدة ومحمرة من عند الاخت فاطمة جراها الله عنا كل
خير لانها سهلة جدا ممكن حتى للمبتدئات يوجدوها وتجي بنينة ان شاء الله
وتحمر ليك وجهك مع ناسك
نبداو بسم الله :
المقادير :
ضلعة ديال الخروف تكون فيها 2 كيلو تقريبا
250 غرام كبدة ديال الخروف
كيس صغير ديال الشعرية الصينية
شعيرات زعفران الحر
150 غرام زبدة
150 فطر مأكول
100 غرام زيتون اخضر مقطع
ملح
ابزار
زعفران العادي اولا الملون
سكينجبير
قزبر ومعدنوس
طريقة التحضير :
اول حاجة من بعد مكنكونو غلينا الما مزيان كنخويوه على الشعرية الصينية ونخليوها تطلق
و ونديرو فإناء الكبدة ديال الخروف مقطعة على شكل مربعات من الاحسن يكونو متساوين
فالقد ديالهم والفطر المأكول الا كان طري من الاحسن مكانش متوفر تكتفي بالمعلب
الزيتون الملح الابزار الزعفران العادي اولا المكون الكيميائي وانا مكنصحش بيه من
الاحسن استعملو الزعفران الحر اولا الخرقوم ونديرو فقط 75 غرام زبدة اي نصف
الكمية وممكن الا كان السمن غتجي اروع
ونجيبو الشعرية الصينية لي غتكون جاهزة ونقطعوها
ونخلطو الكل جيدا حتى العناصر يدخلو فبعضياتهم ونفتحو
الضلعة من جنب واحد والفتحة تكون على شكل الجيب
ونعمروها مزيان بالحشوة ديالنا
ونجيبو خيط ابيض يكون نقي ونخيطو بيه الفم ديال الضلعة ديالنا ونخيبو نصف
الكمية لي بقات ديال الزبدة ونخلطوها مع الزعفران الحر وندهنو بيها الضلعة
ديالنا مزيان ونحطوها فكسكاس تكون البرمة ديالو فيها الما ومن الفوق نديرو
ليه بلاستيك غذائي ونخليوها طيب لمدة ساعة وكل مرة نبقا ندهنو بالزبدة
والزعفران وملي يطيب ويتحمر نقدمو
ضلعة معمرة بالكبدة ومحمرة فطبق التقديم
مرفوق بالخضرة مسلوقة متبلة والفرماج
وهاهيا ضلعة معمرة بالكبدة ومحمرة بالصحة والراحة
كنتمنى تعجبكم وتجربوها متنساوناش
من صالح دعائكم واغلى الناس بالشفاء العاجل
Salam
وعليك السلام
الله يعطيك الصحة ويجعل كل وصفة بحسنات لا تعد انشاء الله غير يجي راجلي كونجي وانا نوريه حداكتي بهاد الضلعة ههههه